أبدت الفنانة المصرية إلهام شاهين استغرابها من تأجيل عرض فيلم "الملحد" أكثر من مرة، وقالت "عملوا للفيلم دعاية بعد ما قالوا إنه توقف عرضه، وهيخلوا الناس كلها عايزة تشوفه".
إلهام شاهين عن تأجيل عرض "الملحد": عملوا دعاية للفيلم
وأضافت النجمة المصرية خلال استضافتها في برنامج "ضيفي مع معتز الدمرداش" "إيه المشكلة في اسم الفيلم الملحد هو مفيش ملحدين في الحياة؟ دي نماذج موجودة ما المانع إننا نلقي الضوء عليها، ونقول إن دول غلط، أنا لما ألقي الضوء على أي حاجة غلط في الحياة بغرض تصحيحها".
وأوضحت "أنا مشفتش الفيلم، لكن اعتقد في الآخر لازم الملحد دا هيقتنع إن في إله لهذا الكون وهو اللي بيدير هذا الكون، إنت ممكن تصلح أفكار ناس من خلال العمل".
إلهام شاهين: أنا مش مع فكرة منع أي حاجة لا في الدين ولا السياسة
وتابعت إلهام شاهين حديثها "لما بعمل فيلم عن الإدمان بجيب المدمن بياخد الشمة، وبيبقى مبسوط وبجيبه في آخر الفيلم، واخد جرعة زيادة ومات، أو بجيبه ومش معاه حق المخدرات وهيتجنن، لما جبته في الأول مبسوط هل دا بيشجع الناس، لأ اللي هتستفيده من الفيلم في الآخر".
وأكدت إلهام شاهين أنها ضد فكرة المنع بشكل عام، وقالت "أنا مش مع فكرة منع أي حاجة لا كلام في الدين ولا السياسة، في 3 حاجات الدين والسياسة والجنس هما القلق بتوع الرقابة، لكن إحنا لو مشفناش أفلام مصرية هنشوف أفلام أمريكية بتتكلم عن الإلحاد والجنس والأديان والسياسات، المنع غلط العيال الصغيرة قاعدين طول النهار على تليفونات صغيرة بيتفرجوا على كل الأفلام من كل العالم".
الإعلان الدعائي لفيلم الملحد يثير الجدل
وأثار الإعلان الدعائي للفيلم قبل نحو أسبوعين الجدل الذي أشعل منصات التواصل الاجتماعي، ما بين من اعتبر العمل يروّج لأفكار تتعارض مع الدين، ويشجع على الإلحاد، وبين من يرى بأنه ينطوي تحت حرية الرأي والتعبير.
ووفق نقاد، فقد ارتفعت وتيرة الاحتجاج بسبب اسم الفيلم وكاتبه إبراهيم عيسى، الذي تثير تصريحاته جدلا واسعا.
قصة فيلم الملحد وأبطاله
ويجمع "الملحد" نخبة من الممثلين مثل محمود حميدة، حسين فهمي، شيرين رضا، أحمد حاتم ويتناول في إطار درامي قضية التطرف الديني والإلحاد، من خلال قصة الشاب يحيى، الذي يجسد دوره أحمد حاتم، حيث يقرر الإلحاد بعد تمرده على أفكار والده الدينية الذي يؤدي دوره محمود حميدة حيث يظهر بصورة رجل ملتحٍ، ما يفتح الباب لصدام حاد بين الأب وابنه. وصُنِّف الفيلم على أنه للكبار فقط، ويُسمح لمن هم فوق الـ16 فقط بمشاهدته.
ولم تتوقف أزمات العمل عند التأرجح بين المنع والإشادة، إنما يواجه المنتج أحمد السبكي قضية من قبل المخرج نادر سيف الدين، مؤلف ومخرج فيلم آخر بعنوان "الملحد" عرض عام 2014 بالاسم نفسه.
