أوضحت الفنانة أسما شريف منير، العديد من الأمور المغلوطة التي تم تداولها مؤخرًا عنها، كما أكدت أنها لم تعد تهتم بمن يتنمر عليها.
وكتبت أسما شريف منير عبر حسابها على موقع "إنستغرام": أنا تخنت، مش 100 كيلو بس تخنت، وعبّرت عن ده بكل صراحة.. طبيعي أحس بعدم راحة لأن جسمي مش زي ما متعودة عليه، ولما اتسألت في برنامج، قلت إني باخد دواء لـ"نوبات الهلع Panic attacks".
أسما شريف منير: بعض الصحافيين حوّلوا كلامي من "نوبة هلع" لـ"نوبة صرع"
تابعت نجلة الفنان المصري شريف منير: للأسف، الصحافة عندنا بقت تهتم بالعناوين المثيرة أكتر من إنها تنقل الحقائق أو تهتم بحال الناس بجد.
وعلى حدِ قولها، أشارت: زمان، الصحفي كان بيتعب عشان يجيب الخبر، وكان شغله فيه أمانة وإتقان وتحقيق، دلوقتي، الأخبار بقت مجرد نسخ و يلا نملى وخلاص، زي التلميذ اللي بيغش وغلط كمان.
ولفتت: بدل ما ينقلوا كلامي صح، حوّلوا نوبة الهلع، لنوبة صرع، وفي قالوا مرض نادر.. جابولي مرض مش عندي.. وأهو الخبر انتشر، وموجود مدى الحياة، والناس اللي هتشوفه في أوقات مختلفة هتصدق المعلومة المغلوطة، حتى لو الحقيقة ظهرت.
أسما شريف منير: شكرًا لمن اطمئن علي بعدما سمع الخبر المغلوط
أكدت أسما شريف منير: أنا من ناحيتي، ما بهتمش برأي الناس، وده اللي مخليني مكملة في طريقي بكل ثقة، أنا شايفة قدامي وعارفة أنا عايزة إيه، ومش عايزة إيه.
وواصلت: التنمر بالنسبالي بقى نعمة، حسنات بتزيد بلا انقطاع، واللي بينتقدني أو يتنمر عليّ بيديني حسنات مش خسارة. كمان، الشخص اللي بيطلع من جواه غل ووحشية، كلامه بيعكس اللي جواه مش أي شيء فيا.
وأوضحت: كل مرة الصحافة تغلط، لازم أقول إن الشغل اللي بيتعمل من غير ضمير مرفوض، وهنفضل نواجهه. وشكرًا لكل اللي اتطمنوا عليّا لما سمعوا الخبر المغلوط. ربنا يشفي كل مريض يارب.
