راندا البحيري تستغيث بـ"المتحدة" ونقابة المهن التمثيلية.. وتروي تفاصيل أزمتها

استغاثت الفنانة المصرية راندا البحيري بالشركة المتحدة للخدمات الإعلامية، ونقابة المهن التمثيلية عبر حساباتها على مواقع التواصل الاجتماعي؛ بسبب ما تتعرض له من ضرائب جزافية، رغم أنها سددت جميع التزاماتها الضريبية. 

وأوضحت راندا في منشورها، أنها تعاني من ضغوط كبيرة، حيث مُنِعَت من العمل في شركات الإنتاج المصري لمدة تتجاوز السبع سنوات بدون أسباب واضحة.

وعبرت عن استيائها من الإجراءات التي تتخذ ضدها، مشيرة إلى أنها طالما التزمت بدفع الضرائب منذ عام 2004. كما أكدت أنها فوجئت بفرض ضرائب جزافية عليها، رغم عدم عملها في التمثيل حالياً، وأنها حصلت على وعود من المسؤولين بتسوية وضعها.

راندا تحدثت أيضًا عن تهديدات يوميًا بحجز أموالها، مما جعلها تعيش في حالة من القلق المستمر. وناشدت نقيب المهن التمثيلية والجهات المعنية بالرحمة بالممثلين المصريين، مؤكدة أنها لا تطلب سوى أن تُترك في حالها لتتمكن من مواصلة حياتها بشكل طبيعي.

 

القصة الكاملة لأزمة راندا البحيري.. والفنانة تستغيث 

وجاء في رسالة راندا البحيري عبر حساباتها في مواقع التواصل الاجتماعي: الشركة المتحدة للخدمات الإعلامية.. السيد نقيب المهن التمثيلية تحية طيبة وبعد.. هذا ليس بيان شجب ولا شكوى ولا أي شيء آخر، كل ما في الأمر عرض موضوعي على حضراتكم، لقد حوربت بداخل شركات الإنتاج المصرية، وتم منعي من العمل بدون إبداء أسباب وبالفعل بعد أكثر من بروفة للأكثر من عمل وأكثر من محاولات لدخولي أعمال فنية بلاقي نفسي فجأة اتشالت منها، ومش فيها والعمل بيكمل من غيري.

وأضافت: الكلام ده بيحصل بالضبط بقاله أكتر من 7 سنوات وبيحاولوا فيه بقالهم أكثر من 13 سنة بمساعدة أحد الأشخاص خارج المجال الفني، وليس هذا صلب الموضوع أبداً، أنا بتعرض بقالي أربع سنين دلوقتي لضغط لا يمكن لواحدة ست تقدر تتحمله لوحدها، أنا مشتكتش ولا خليت شكل الفن والفنانين وحش والتزمت الصمت وبقالي سنين بحاول اشتغل في مشاريع، وفيه منها اللي ربنا كرمني فيه وفيه منه اللي علشان عدم خبرتي الكبيرة آنذاك أتنصب علي فيه يعني بسبب ان مفيش عدل في المنظومة أتنصب علي في فلوس كنت شغاله بيها وجايباها بتعب كبير جدا.

وتابعت راندا البحيري حديثها: كنت طول عمري شخص ماشي صح جدا فيما يخص الأوراق وحق الدولة وضرائبي كلها مدفوعة من 2004 يعني بقالي 20 سنة بدفع للضرائب، وأظن لو أنا شخص مش ماشي صح مع الضرائب كان من زمان هتلاقي حد قال راندا مدفعتش أو معملتش أو كذا وكذا، ومحدش أصلا يقدر يشكك في حبي لبلدي الشديد ووطنيتي، وفي نزاهتي الحمد لله رب العالمين.

ولفتت: اكتشفت من فترة أنهم حاطين عليّ ضرائب جزافية بالرغم من أني مبشتغلش في التمثيل أصلا وكل ما اكلم حد في المبني بيقولي اصل الممثلين كلهم حصل معاهم كده مش انتِ بس، طب أنا بتكلم عن نفسي، اتكلمت مرة واتنين وكلمت نقيبي السيد أشرف زكي وهو أداني نمرة تليفون الأستاذة مها المختصة عن الممثلين أمام الهيئة العامة للضرائب بحيث أنها تفهمهم وقالي إن الموضوع ده هيخلص لان الممثلة دي حاليا لا تعمل بالتمثيل، فمش هينفع اننا ندفعها فلوس قديمة هي أصلا دفعتها قبل كده.

راندا البحيري: مهددة يوميا بالحجز على أموالي

وكشفت راندا البحيري: وبالمستندات احنا أنا والمحاسب الضريبي المحترم اللي شغال معايا دفعنا الفلوس اللي علينا من قبل 2005 كل سنة بندفعها في سنتها إنما، هم مرة واحدة عايزينك تدفع ضرائب جزافية هم اللي حسبوها من غير ما يرجعولك واضطريت في المرة الأولى نظراً لحبي لبلدي واحترامي لكيان الفنان المصري وعدم اهتزاز صورته أمام المصريين والعرب إني أمضي على رقم كبير جدا مع إني متأكدة إن أنا مش المفروض ادفع الكلام ده علي وعد منهم السيد عمرو حجازي والسيد احمد عبد الغني إني هدفع أصل المبلغ ومش هدفع غرامات علي المبلغ ده.

كما بينت الفنانة المصرية: وبالفعل وقفوا غرامات وبقالي كذا سنه بقسط المبلغ ده للضرائب لحد الحمد لله ما خلصته كله، فوجئت بعد ما المبلغ خلص أولا بمبني القيمة المضافة بيكلمني عايز يدفعني غرامة، بالرغم من إنهم وعدوني مفيش غرامات.. والغرامة دي أكتر من المبلغ نفسه اللي بقسطه بقالي سنتين ثم اتصال من كذا مأمور (ضرائب عامة)) طالبين مني فحص كل سنين العمل اللي اشتغلتها، افحص 2006 اللي ورقها بقي لونه أصفر ؟؟؟؟؟ وطالبين إني أدفع من 2006 لحد 2024 يعني 18 سنة ضرايب أنا دافعاهم أصلا قبل كده، قولتلهم أنا دفعت ده، قالولي مينفعش قولتلهم إيه هو اللي مينفعش قالولي أصل احنا واخدين تعليمات أن كل الممثلين يدفعوا أزيد من اللي دفعوه، قولتلهم التعليمات دي منين ؟؟ محدش رد، قالولي كده كده هتدفعي حتي لو دفعتي قبل كده.

وتابعت: مع الضغط عليّ اضطريت اني أعمل جلسات مع الضرائب لحد ما كل الناس هناك بقوا يشوفوني يومياً وبجد فيه ناس تعاطفت جدا مع موضوعي لأنهم بالفعل شايفينني دفعت قبل كده، إلا مختصة الحجز كل يوم بتكلمني (((أنا هحجز عليكي)))، أنا أول مرة أشوف موظف بيتصل بعميل الساعة ٨ بالليل بعد مواعيد العمل علشان يقوله أنا هحجز عليك يتم تهديدي يوميا بالحجز علي أموالي يتم تهديدي يومياً بالضرايب مع اني دفعت كل ضرائبي لحد آخر عمل عملته، يتم تهديدي يوميا بالضرايب مع اني لا أعمل مع المتحدة ولا غيرها.

واختتمت راندا البحيري رسالتها بالقول: السيد نقيب المهن التمثيلية السادة المسؤولون عن الإنتاج في مصر ارحموا الممثل المصري ارحمونا وبجد بجد والله ما بطلب شغل أنا أصلا فقدت الشغف كممثلة، و مش عايزه أشوف وش الكاميرا دي تاني، أنا فعلا كل اللي طالباه إنكم تسيبوني في حالي، بس مش أكتر، يا أسيادنا أنا عايزة أكمل حياتي في مصر مش عايزة أدور على شغل برا ولا عايزة أعيش في حتة تانية ليه مصممين تزقونا كلنا ندور على حياتنا في حتة تانية أنا قاعدة هنا.