ردّ السينارست المصري تامر حبيب على تصريحات المخرجة إيناس الدغيدي الأخيرة بشأن ميوله المختلفة واتهامه بالمثلية.
وقال حبيب خلال استضافته في برنامج "حبر سري" الذي تقدمه الإعلامية أسما إبراهيم: "أنا معنديش حاجة اتكسف منها أنا متأكد أن تصريحاتها كانت ردا على كلام اتقال خلال الندوة، لكن ده مش رأيها الشخصي".
وأضاف: "إيناس الدغيدي، بحبها جدًا على المستوى الفني والشخصي، هي صديقتي، والتصريحات اللي قالتها حصل لعب في المونتاج".
وتابع: "طلع كلام إني خدت موقف عدائي من إيناس بعد التصريحات دي ولكن بالعكس اتقابلنا بعدها واتكلمنا وشرحت لي هي قالت كده ليه، بعد الموضوع ده قبلت ناس وقفوا معايا، وشكرا إن الموقف ده حصل علشان يظهر كم الحب ده لي".
وأكد السيناريست المصري أنه لم يندم على تقديم شخصية المثلي في فيلم "واحد صحيح"، قائلا: "لم أندم على شخصية المثلي في فيلم واحد صحيح وده نموذج موجود في المجتمع ومفيش مشهد ندمان عليه".
وفي سياق آخر، قال تامر حبيب إنه حاول الانتحار بسبب تناوله دواء للتخسيس، معلقا: "حاولت انتحر مرة زمان لأني كنت باخد دواء للتخسيس وعملي اكتئاب".
وأضاف: "كنت شغال محاسب وبعمل حاجة مبحبهاش، وكنت متوتر جدا وعندي طموحات تانية وأحلام تانية، وفي لحظة فكرت في الانتحار ومن بعدها خدت قرار إني أغير مساري وحياتي".
وبشأن آرائه الشخصية حول الزواج وسبب رفضه للارتباط، والمساواة بين الرجل والمرأة، فقد علق: "أنا شايف الست أهم ألف مرة من الراجل لأنها هي اللي بتعمل الراجل وكلنا اللي عملتنا أمهاتنا وكل راجل طلع عامل أزاي هو صورة عن تربية أمه".
ووصف حبيب مؤسسة الزواج بـ"الفاشلة"، مضيفًا: "أنا شايف الزواج مؤسسة اجتماعية فاشلة ولو جه نصيبي في الجواز زي القطر هتجوز مجاش خلاص.. وعندي ناس أعرفهم عندهم موضوع المساكنة ولكن دفن الرأس بتاعتنا زي النعام مليش دعوة به".
وتابع: "جزء من مهنتنا نقف في وش المدفع ونتكلم على المسكوت عنه ودي نماذج في حياتنا ولو قعدت أعمل حساب للهجوم على السوشال ميديا مش هعيش حياتي".
