تامر حبيب عن أزمة منة شلبي: كان "أسود" أيام حياتي.. ونسيت ذكرى وفاة والدتي

كشف السيناريست المصري تامر حبيب، عن مكالمته للفنانة منة شلبي، وذلك بعد الأزمة التي تعرضت لها الأخيرة قبل أشهر قليلة عقب اتهامها بحيازة مخدر الحشيش بقصد التعاطي.

وقال حبيب في تصريحات لبرنامج "حبر سري" الذي تقدمه الإعلامية أسما إبراهيم: "اليوم ده كان من أسود الأيام في حياتي، لغاية ما عرفت إنها في طريقها للبيت خدتها في حضني جدًا.. وكان همي إنها تضحك وتنبسط وأعمل أراجوز عشان تضحك، وكان في قسوة من البشر".

وأضاف: "الناس بقت تحكم على كل حاجة مفيش أكتر من عزاء أمي والناس القريبة مني كانوا بيحضونني ويبوسني، وقالوا بنرتكب معصية وده موت معصية ايه اللي نرتكبها؟".

وفاة والدة تامر حبيب

وعلى صعيد آخر، أكد تامر حبيب أن والدته الراحلة، تركت أثرا كبيرا في حياته كما وصف، مضيفا: "لسه مستوعبتش رحيل أمي، عارف إنها مشيت بس لغاية دلوقتي بتيجي لحظات أتعامل إنها موجودة وأقول أنا هجيب كذا لماما عشان بتحبه، بس أرجع أفتكر إنها مش موجودة، وحصلت حاجة غريبة إني أول مرة أنسى ذكرى وفاة أمي السنة، وهي السنة الخامسة، ومحستش بتأنيب ضمير عشان خلاص لازم الحياة تمشي، أنا مؤمن إن هي مشيت فعلا، بس لازم أطبق إيماني ده في الواقع وأتأقلم".

وبين: "أنا برج السرطان، وده برج عموما بيبقى متعلق بأمه جدا، بس أنا عمري ما كان عندي الصفات اللي بتكون في الولد الوحيد، زي إني مش أناني ومش اعتمادي على الناس، وده حتى بطبيعة شغلي إني أنا القائم على العمل، وهي كمان مكنتش أم أنانية".

ولفت تامر حبيب: "جملة اللي من غير أم حاله يغم دي بحسها بيني وبين نفسي ساعات، بس الحمد لله حالي في الدنيا عموما حلو وكان خيالي إني اليوم اللي هفقد فيه أمي أنا كمان هروح، بس اكتشفت إن ربنا زي ما بيدي الإنسان الابتلاء بيدي كمان قوة تخليك تكمل، ومكنتش متخيل إني هقدر أدفن وأعمل كل ده".

واستذكر تامر حبيب يوم وفاة والدته، قائلا: "أمي لما توفيت كنت في لبنان ودايما لما بسافر تقولي لما توصل كلمني طمني ودايما بنسى أطمنها، ويومها نسيت أكلمها أطمنها وكنت معزوم في مكان حلو أوي والجو حلو أوي، ولما قولتلها كدة قالتلي يا رب من بيت حلو لبيت أحلى ومن جنينة حلوة لجنينة أحلى ومن جو حلو لجو أحلى، بس بعدها اكتشفت إنها كانت بتدعي لنفسها وراحت لبيت أحلى لما توفيت".

واختتم السيناريست المصري حديثه، موجها رسالة لوالدته في شهر رمضان، وقال: "عايز أوجه لها رسالة في رمضان، إني رجعت أصلي أول رمضان، لأني مكنتش بصلي بس بقيت منتظم في الصلاة جدا وبالصدفة إن صورتها في اتجاه القبلة فـ بحس إننا بنصلي سوا".

تامر حبيب عن حضوره حفل زفاف يوم جنازة سمير غانم

وعلق تامر حبيب على الهجوم الذي تعرض له بعد مشاركته في حفل زفاف في الجونة، يوم جنازة الفنان سمير غانم، وعدم حضوره الجنازة على الرغم من عملهما معًا.

وقال حبيب: "أستاذ سمير غانم الله يرحمه لو مكاني ممكن هو يعمل كده لأنه كان راجل بيموت في البهجة، وأنا يوم جنازته كنت في الجونة وعندي الفرح وكنت عايز أرجع القاهرة أحضر الجنازة وأرجع تاني على الفرح بالليل".

وتابع: "أنا مؤمن بـ ده وكتبت وقتها لما لاموا علينا لما روحنا الفرح بالليل في نفس يوم جنازة أستاذ سمير غانم، وبكرر كلامي تاني وأنا مسؤول عنه، لما أموت عايز كل اللي بيحبوني يعملوا حفلة كبيرة على سيرتي ويشغلوا الأغاني اللي بحبها ويفتكروا المواقف الحلوة ويرقصوا ويتبسطوا، وساعتها هكون أكتر واحد مبسوط في الكون، ودي تعاملي مع الموضوع".