رانيا يوسف: أعرف من وضع مخدرات بسيارتي.. ونادية الجندي نجمة شباك بفلوسها

قالت الفنانة المصرية رانيا يوسف، إنها واجهت العديد من المشاكل في زيجاتها السابقة، دون أن يساندها أو يدعمها أي شخص، على حد تعبيرها.

وقالت يوسف خلال لقائها مع برنامج "العرافة": "اتجوزت الجوازة التانية والتالتة عشان خفت على سمعتي بعد طلاقي من مختار، وكان فيه ضغط من المجتمع عليا، وكنت بعمل حساب للمجتمع لكن دلوقتي لا".

وتابعت: "ملحقتش أسأل على جوزي التاني، كنا في 2011 وكنت عايشة لوحدي والبلد تمر بفترة صعبة، وتورطت بالزواج من شخص نصاب ادعى أنه طبيب، وحصل بيني وبين ابو البنات مشاكل كتير ومكنتش لاقية حد يحميني، وأنا لما اتجوزته كانت نيتي معاه كويسة.. أنا محدش بيضحك عليا، ومش هتجوز ومش هحب".

وأكدت الفنانة المصرية أنها لم تقدم على خطوة الزواج من رجل غني؛ لأنها لا تهتم بالوضع المادي الذي يتحلى به، والدليل على ذلك بأن طليقها محمد مختار يتمتع بوضع "مستور"، مشيرة إلى أنها تستطيع بمدة قليلة الزواج من أغنى الرجال في الوطن العربي، لكنها ترفض ذلك.

علاقتها بطليقها محمد مختار

وكشفت رانيا تفاصيل عن علاقتها بطليقها محمد مختار، قائلة: "نادية الجندي كانت بتوقع بيني وبين جوزي، ومش هتكلم في تفاصيل، مينفعش يبقى فيه خلاف أو طلاق ويبقى فيه تقويم عليا وعلى بناتي".

وأضافت: "أنا أتاذيت وعيالي أتاذوا.. محمد مختار محترم ولطيف وكويس، وماضية تعهد أني متكلمش في الحاجات دي بناء على اتفاق بيني وبين محمد مختار لمصلحة البنات، دلوقتي بيننا كلام بسيط، وعلاقته ببناته كنت أتمنى أنها تبقى أحسن، والآن بناتي تعبانين نفسيا وماديا".

سبب توتر علاقة يوسف وناديا الجندي

وتطرقت يوسف للحديث عن خلافها مع نادية الجندي، لافتة: "ربنا يعلم، بالنوايا والنفوش والأعمال، لما يبقى فيه حرب دايما من تحت لتحت، أنا لما بحارب حد بحاربه في وجهه وبشكل مباشر، ومش بحاربها، احاربها ليه؟ لا هاخد أدوارها، وهي مش محتاجة تاخد أدواري".

وأضافت: "بيني وبينها حاجات شخصية، مش على المستوى الفني، على المستوى الإنساني وحياتي بناتي مش عادلة، أحترم فيها الاستمرارية والإصرار، بس النجومية بتتعمل بحاجات كتير، وفيه نجوم مش موهوبين، هي ليها أفلام لطيفة، وأنا مكانش عندي فلوس أنتج لنفسي، ولو كان عندي فلوس مكنتش هعمل زيها".

وتابعت: "هي نجمة شباك بفلوسها، أنا مش من جمهورها ولا عمري هكون من جمهورها، مكنش فيه حد على الساحة غيرها هي ونبيلة عبيد وعادل امام، انا مش معترضة أنها نجمة شباك، نادية الجندي إلى حد ما عندها موهبة، بحب ليها الباطنية والرغبة".

قضية المخدرات

وعن قضية المخدرات التي اتهمت بها، أوضحت يوسف: "أنا عارفة مين اللي حطلي الحشيش في العربية بس معرفتش أثبت؛ لأن العربية كانت في جراج، وهو معاه المفتاح، وأثبت أنه أخد العربية يعملها صيانة".

وواصلت حديثها: "يكفيني أن الناس كانت عارفة أني بريئة، ربنا رب قلوب ونوايا.. أنا لما اتجوزته كنت شايفاه ولد كويس أوي".