كشف الفنان المصري أحمد السقا كواليس مشاركته في مسلسل "حرب" الذي يعرض ضمن موسم دراما رمضان الحالي.
وقال السقا في حوار إذاعي: "مكنش فعلًا عندي حاجة في الدراما الرمضانية السنة دي، وقبل شهر رمضان بأيام معدودة لقيت محمد حسن مدير أعمالي بيكلمني بيقولي عايزك ضروري".
وأشار إلى أن مدير أعماله لا يتطرق للعمل في فترة الإجازة: "في العادة لما بيبقى عندي يوم إجازة مش بحب اتكلم في شغل، بروح أتمرن وأركب خيل ومبعملش حاجة تاني.. ولقيته بيقولي عندي مصيبة في البيت ومش هينفع في التلفون".
وتحدث عن سرعة البدء بتصوير المسلسل: "رحت له على البيت وقال لي كنت قاعد مع فلان وفلان كلموني عشان هنعمل مسلسل في رمضان وهنبدأ تصوير يوم الثلاثاء الجاي قلت له أنت بتهزر قالي لا.. فطلبت أقعد مع أستاذ أحمد نادر جلال والمؤلف هاني سرحان تاني يوم الصبح على الأقل".
"مغامرة قد تكنس تاريخي"
ووصف السقا قبول مشاركته في المسلسل "بالمغامرة"، موضحا "قلت يا واد أنت لو خدت الريسك ده يا هتلبس في حيطة يا إما هتبقى كنست تاريخك كله ويبقى نقطة ومن أول السطر".
وأضاف "كانت مغامرة تستحق الريسك.. وبعدين وافقت.. ولكن قولتلهم مش هنصور الثلاثاء هنصور السبت.. عشان أكون لحقت أقرأ وأذاكر".
شكله المرهق في المسلسل
وعلق على الانتقادات التي طالته بسبب شكله المرهق في المسلسل، قائلاً: "بالنسبة لشكلي المرهق في المسلسل هو إني خسيت ونزلت وزني الفترة اللي فاتت؛ لأني كنت باخد كورتيزون ولما وقفته بعناية الأطباء بقيت فرحان بشكلي في المسلسل".
وأضاف: "وخدت قرار إني مش هشتغل دور الإرهابي بالشكل التقليدي اللي بيكشر ويزعق ويتكلم بلغة الدين دايمًا أنا هعمله إنسان عادي وجاحد عشان يوصل للناس".
وتحدث السقا عن تفاصيل رسم ملامح الشخصية: "أنا بشتغل مع فريق عمل قعدنا نشوف هنعمل فرق السن إزاي، والدقن اللي كنت بعملها في الأول كان تركيبها بياخد ساعة ونص لأنها بتترسم شعرة شعرة عشان تبان طبيعية، أما فيما يخص هدوء الشخصية لما تشوفي النهاية هتعرفي إن الراجل ده مش صاحب مبدأ ومش عايز احرق الأحداث، واللي كان بيحركه حاجة تانية خالص".
خوفه من الظهور بشخصية شريرة
وأكد أنه لم يشعر بالخوف بسبب ظهوره للمرة الأولى بشخصية الشرير، حيث كان هدفه "كره" الجمهور له بسبب ظهوره بدور "إرهابي".
وقال "بعد ما قعدنا ووافقت وطلبت التأجيل الكام يوم دول وكلمت فراج ولعب دور جميل وساندني وبريقه منعكس عليّا، كل الناس كانت مستغربة إني وافقت، وكان هدفي إن الناس تكرهني".
وتابع: "لأني لو اتحبيت وأنا إرهابي تبقى مصيبة سودا، الحمد لله ربنا وفقني في تحضير الشخصية مع فريق العمل ووصلنا لشكل خارجي كويس".
أخبار ذات صلة
طبقة صوته
وأشار الفنان المصري إلى أنه استخدم خلال المسلسل طبقة صوت "أتعبته"، وقال: "اشتغلت من طبقة صوت لحد دلوقتي تعباني.. الطبقة عريضة.. لحد دلوقتي باخد أدوية.
نومه على سرير من مسامير
وكشف عن معاناته أثناء تصوير المسلسل، مشيرا إلى أنه كان ينام على سرير مكون من مسامير بحسب تعبيره.
وأضاف: "ده كان بجد وكانت مسامير بس كانت مسامير مبرودة ليها طريقة قعدة معينة وحد بيمسكني لحد ما أنام على ضهري ومقدرش أقوم لوحدي لازم حد يقومني عشان مضغطش نفسي عليها واتخرم".
وأبدى السقا شعوره بالخوف من عرض المسلسل في آخر الموسم الرمضاني: "كنت مرعوب من عرض المسلسل في الثلث الأخير من رمضان وبقيت بدعي ربنا متخذلش، وبفضل الله وأحمد نادر جلال قدرنا نطلع المسلسل بالشكل اللي يليق، وأنا بسميه حفيد العظماء مكنش بينام بنخلص تصوير ويقعد على المونتاج وتصحيح الألوان".
