وثّق الطفل المصري عمر الشريف الذي لفت انتباه الجمهور بشخصيته "ياسين" في مسلسل "تحت الوصاية"، مقطع فيديو برفقة بطلة العمل منى زكي، وهما يغنيان ويرقصان على أغنية "يا دنيا هاتي كمان هاتي".
وأحدث المقطع الطريف الذي جمع الثنائي تفاعلا واسعا على مواقع التواصل الاجتماعي، فيما قال الشريف إن الفيديو تم توثيقه من كواليس تصوير مسلسل "تحت الوصاية"، وعلق عليه قائلا: "حنان و ياسين بعد ما الدنيا جات عليهم".
وكتبت إحدى المتابعات: "واحنا قاعدين طول يوم العيد نبكي بسببكم، حبيبي انت موهبه عظيمه ياسين اكتشاف كبير برافو يابطل برافو من القلب ابدعت وضحكتنا وعيطتنا وغيرت قانون كنت سبب كتير انه اطفال كتير زي ياسين وفروحه هتتغير حياتهم بسببك انت مثال حي ع الشطاره ولما الادوار تعطى بجد لمستحقيها".
وأضافت أخرى: "انت دخلت قلبي بكل سهوله ياعموره بجد ربنا يحفظك ويفرح مامتك بيك ❤️وعيطتني اوي اخر حلقه 😢 متعملش كدا تاني وتخليني اعيط قبل العيد😂".
وكان الطفل عمر شريف قد وجه رسالة إلى منى زكي، محتفيا بهذه الفرصة المميزة التي حظي بها بالمشاركة معها في المسلسل بدور ابنها، وقال: "شكرا على الفرصة الكبيرة اللي ادتيهالي إني أشتغل مع حضرتك.. شكرا على ثقتك فيا.. أتمنى أكون قدها.. اتعلمت من حضرتك كتير أوي على المستوى الفني و الشخصي".
وأضاف: "مش عارف أوصف قد إيه كنتي حنينة عليا ورا الكاميرا وده طمني وساعدني أكون أحسن، الشغل معاكي حاجة هفضل أفتخر بيها طول حياتي.. أشوفك قريب يا حنان.. وهخلى بالى من فرح #تحت_الوصاية".
من جانبها، تحدّثت المحامية نهاد أبو القمصان عن مصير أبناء حنان (منى زكي) في المسلسل وفقا للقانون، في منشور لها عبر “إنستغرام” قائلة: “الأم اتسجنت ليه؟ الأم اللي نجحت فى إدارة أموال ولادها وعملت مطعم اتسجنت بتهمة السرقة، لأنها أخدت أموال القصر بدون موافقة من النيابة الحسبية، والعم كان ممكن تنازل عن البلاغ، بس محدش بيطمع وفجأة يطلع ملاك ويتنازل”.
وأضافت: “مين هيصرف على العيال؟ قانونا الإنفاق مسئولية عمهم لأنه الوصى، وحتى لو مش وصى لأنه قرابة من جهة ”العصب”، ولأن العم فاشل فى إدارة حياته أصلا ومش عارف يصرف على نفسه ويتجوز، فغالبا مش هيعرف يصرف على الولاد، طيب يروحو لخالتهم؟ خالتهم مش بتشتغل وجوز خالتهم مش ملزم يصرف عليهم أو ربما معندوش إمكانية يصرف، فغالبا الأولاد هيتحطو فى دار رعاية”.
وأوضحت: “ممكن البعض يشوف دا صعب قوى أو خيال مؤلف، لكن فى الواقع وفى المحاكم حكايات صعبة أصعب من كدا كمان، لما بنحكى للمؤلفين عن اللى بيشوفوه فى الواقع بيتصدموا لأن قوانيننا من أيام أهل الكهف.. مسلسل ”تحت الوصاية” حطنا قدام مراية قانون من ضمن قوانين كثيرة قوى أقل ما يقال عليها (سيئة)”.
وعلقت الفنانة منى زكي على رسالة المحامية نهاد أبو القمصان بالقول: "يارب يحصل أي تغير ينصف ملايين زي حنان".
ومسلسل "تحت الوصاية" من تأليف خالد وشيرين دياب، وإخراج محمد شاكر خضير، وبطولة منى زكي، دياب، أحمد خالد صالح، نهى عابدين، رشدي الشامي، مها نصار، علي الطيب، أحمد عبد الحميد، محمد السويسري، وعدد آخر من الفنانين.
