وجهت الفنانة المصرية دنيا سمير غانم رسالة شكر إلى كل طاقم مسلسلها "حتة تانية" الذي عرض في شهر رمضان المبارك، كما لم تنس ابنتها "كايلا" التي شاركتها دراميا للمرة الأولى في حياتها.
وأكدت دنيا أن ابنتها أبهرتها جدا بأدائها في المسلسل، وعلقت: " شكرا لروح قلبي وحياتي نجمتي الصغننة اللي نورتني و أبهرتني أنا شخصيا ما شاء الله".
ووثقت الفنانة صورًا لابنتها كايلا وفريق العمل من كواليس مسلسل "جت سليمة"، عبر حسابها الرسمي بموقع انستغرام، وعلقت عليها قائلة: شكرًا للمخرج العمل إسلام خيري اللي تعب جدًا في العمل ده شكرًا لكل طاقم العمل، ولكل فرد شارك في النجاح الكبير ده الحمد لله، شكرًا على حبكم وخوفكم عليا اللي أنا كنت حاساه في كل لحظة وأنا بشتغل".
وأضافت: "شكرًا للجمهور العظيم اللي بعد كل عمل بيثبتلي إن ليا أهل في كل البيت الحمد لله، وبيخليني أعمل أقصي ما عندي عشان أكون عند حسن ظنكم شكرًا لجوزي وحبيبي رامي رضوان اللي دايما بيدعمني وبيفرح لنجاحي".
وأوضحت: "وأخيرًا بقى شكرًا لروح قلبي وحياتي نجمتي الصغننة اللي نورتني وأبهرتني أنا شخصيا ما شاء الله ربنا يحفظك يا قلبي، ويكتبلك الخير والسعادة أنتِ وكل أطفالنا ويا رب مستقبلكم يكون منور وحظكم أحسن مننا يا رب كل سنة وأنتم طيبين".
وواصلت: "مشروع كبير تعبنا فيه جدا عشان نقدر نعمل حاجة تسعدكم جت سليمة، شكرا للمنتج محمد أحمد السبكي الشاطر جدا اللي مش بيسيب ولا تفصيلة صغيرة غير لما يكون مطمن أنها متنفذة على أكمل وجه شكرا على مجهودك الكبير واهتمامك، شكرا المنتج الكبير الأب أحمد السبكي اللي بيحب الفن حب غير عادي ونفسه دايما يقدم أعمال تعجب الناس.. شكرا لكريم وخالد السبكي ربنا يخليكوا لبعض".
كما جاء في رسالتها: "شكرا محمد سلام اللي فعلا بستمتع وأنا بمثل معاه لأن تمثيله وإفيهاته وإحساسه out of the box، وأعتقد بيبان عليا كل مرة بنشتغل مع بعض، شكرا أستاذ خالد الصاوي الجامد أكتر ممثل عنده ضمير في الدنيا وتفانى في العمل غير طبيعي أنا فعلا بتفرج عليك وبتعلم وبسرح في أدائك العبقري اللي فيه الجد ممزوج بالهزار بدرجة مظبوطة جدا".
وأضافت: "شكرا أستاذ سامي مغاوري الفنان القدير السهل الممتنع اللي وجوده بيضيف إضافة غير طبيعية ربنا يديك الصحة، شكرا أستاذة هالة فاخر الراقية، قدمت شخصية بإبهار شديد وبتميز، كل مشهد ليكي بيحسسني بسعادة كمشاهدة من قبل حتى ما تتكلمي، شكرا محمد ثروت، أنت عملت الشخصية بطريقة جديدة وبخفة دم فظيعة كالعادة".
وتابعت: "شكرا للقديرة المتمكنة جدا جدا جدا سلوى خطاب، نورتينا ووصلتي رسالة عظيمة من خلال إتقانك لشخصيتك واستحملتي الميك اب الصعب ده لعدد ساعات طويل جدا في سبيل أنك تعملي الشخصية كويس، شكرا للقديرة سلوى محمد على أدائك لأم العريف غير متوقع ومش كليشيه تماما، أول مرة أحس أن الساحرة أو الـ witch قريبة مننا كده وإنسانة عادية لكن عندها قدرات وشر وفي نفس الوقت هزار حقيقي أمتعتينا، شكرا للجميلة رحاب الجمل كنتي لذيذة جدا بجد وأنا سعيدة أوي اني اشتغلت معاكي لأني من معجبينك".
واختتمت: "شكرا الطفل آدم النحاس.. أنت بجد ما شاء الله موهوب أوي وفنان أوي وصوتك حلو اوي اوي اوي ما شاء الله والطفل آدم نور.. أنت شاطر اوي وأقنعتني أوي في الأول وبعد ما اتغيرت كمان برافو عليك، شكرا للفنان الكبير اللي أنا بعشقه وماقدرش أكون في عمل هو مش فيه بيومي فؤاد أنت أضافتلنا الكوميديا بتاعتك اللي ماحدش بيعرف يعملها غيرك.. عملتلنا نعنشة في المسلسل".
وشاركت كايلا ابنة الفنانة دنيا سمير غانم، والإعلامي رامي رضوان في الحلقة 12 من مسلسل جت سليمة، ولاقت العديد من الإشادات والتعليقات الإيجابية بعد ظهورها على الفور.
يذكر أن مسلسل جت سليمة عُرض في النصف الثاني من شهر رمضان، وهو مكون من 15 حلقة، من بطولة دنيا سمير غانم، محمد سلام، خالد الصاوى، هالة فاخر، سامى مغاورى، محمد ثروت، بيومى فؤاد، غادة طلعت وعدد آخر من الفنانين، وتأليف كريم يوسف وسامح جمال، وإخراج إسلام خيرى وإنتاج أحمد السبكي برعاية المتحدة للخدمات الاعلامية.
