"انسحبت من المسرحية لأن مينفعش أبقى بعمل عرض محترم وألاقي خروج عن النص وألفاظ خارجة وإيماءات مقبلهاش".لوسي
أكدت الفنانة المصرية لوسي، أن انسحابها من مسرحية "الحفيد"، يعود إلى التغيير الذي طرأ على قصة العرض بعد البروفات، والخروج عن النص، ووجود بعض الألفاظ الخارجة والإيماءات التي لا يمكن قبولها، بحسب تعبيرها.
وقالت لوسي بمداخلة هاتفية لها مع برنامج "الحكاية": "أنا انسحبت من المسرحية لأن مينفعش أبقى بعمل عرض محترم وألاقي خروج عن النص وألفاظ خارجة وإيماءات مقبلهاش أنا لو في الشارع هقف أقول إيه اللي أنت بتعمله؟، ما بالك بقى على خشبة المسرح القومي، اللي وقف عليه أساتذتنا".
وأضافت: "أنا مقدرش استحمل، وقلت كذا مرة إحنا بنعمل عرض كويس ومحترم وعندنا إقبال".
وأكدت لوسي شعورها بالتعب من شخصيتها في المسرحية: "الناس جاية لتلت أسماء لوسي والمسرح القومي والأديب عبد الحميد جودة السحار، أنا رميت الموضوع ده ورا ضهري لأني تعبت، 44 ليلة عرض أنا كنت بنزف دم من مناخيري وبعمل 3 مراحل، وفي 30 ثانية بتلاقيني واحدة ست كبيرة و30 ثانية بتلاقيني واحدة ست صغيرة، مفيش التزام بالحوار واللي عنده جملة عايز يخليها 25".
وأشارت إلى أنها لم تتعد بالضرب على أي شخص من زملائها: "اللي بتقلك أنا ضربتها بالقلم أنا ضربتك القلم الأول والتاني التالت والرابع والخامس سكتي ليه، وبعدين تستشهد بالكاميرات يقولك مفيش كاميرات إحنا مسحناها، طب أجيب حقي إزاي.. أنا مضربتش حد طبعا، أنا بقالي 30 سنة في الوسط الفني ويشهد عليا النقيب إني معنديش شكوى، هو أنا رايحة اتخانق".
وتابعت لوسي: "أنا استحملت شباب جدد عشان أدي فرصة وشباب موهوبين وكويسين، واللي طالع يجيب سيرتي ويغلط فيا الأستاذ إيهاب فهمي مدير المسرح سابقا مشاه".
تامر فرج يعلن عودة "الحفيد" ببطلة جديدة
وكان الفنان تامر فرج قد أعرب أخيرا عن سعادته بعودة مسرحية "الحفيد" في موسم جديد قريبا، مشيرا إلى تغيير بطلة العمل الفنانة لوسي؛ إذ ستحل مكانها الفنانة سما إبراهيم.
وكتب فرج عبر صفحته الشخصية في "فيسبوك": "الحمد لله، الحق حلو، خصوصا لما يرجع لصحابه ألف مبروك لصحابي، وزمايلي وأولادي أبطال مسرحية الحفيد لعودة عرضها لموسم جديد قريبا ببطلة جديدة وهي الفنانة الجميلة سما إبراهيم على خشبة المسرح القومي، اختيار عظيم وخبر جميل".
مسرحية "الحفيد"
يذكر أن مسرحية "الحفيد" مأخوذة عن رواية للأديب عبد الحميد جودة السحار، وتناقش العادات والتقاليد الأسرية بشكل كوميدي اجتماعي.
وتتناول المسرحية قصة الأسرة المصرية التي تتحكم فيها العادات والتقاليد دون الوعي، للتأثير الذي تتركه في الأولاد من أبعاد نفسية مرهقة، من خلال لعبة درامية مختلفة بتتابع درامي غير تقليدي يستخدم كوميديا الموقف.
ويشارك في المسرحية كل من: لوسي، تامر فرج، عادل عفر، محمد مبروك، شيريهان الشاذلي، يوسف المنصور، رنا خطاب، زينب العبد، محمود عبدالرازق، نشوى علي عبدالرحيم وندا عفيفي، وهي من إخراج يوسف المنصور.
