وفاء سالم: انتهكوا طفولتي بقسوة ووقاحة.. وجسمي النحيل توجّع من أحضانهم

بعد أيام من إعلانها اعتزال مهنة التمثيل، عادت الممثلة السورية المقيمة في مصر وفاء سالم إلى جمهورها في أول مقطع فيديو لها تحدثت خلاله عن بعض الأمور المتعلقة بحياتها الخاصة، وتحديدًا في طفولتها.
وكشفت "سالم" إن طفولتها تعرضت للانتهاك، وهذا كان ضمن أسباب اعتزالها وابتعادها عن المجال الفني، معلقة: "عندما كنت صغيرة، كنت أُفضل أن أجلس أسفل المنضدة، ولم أُغير ذلك المكان، وأسمع دائمًا أصوات الأواني والشوك ورائحة الطعام، وعندما يبدأون في التسامر أكون في عالم آخر غير العالم الخاص بهم، وكانوا يعتبروني مثل قطتهم السيامي التي يلعبون بها".
وأضافت وفاء: "كانوا بيقعدوني على حجرهم وبينقلوني من حجر لحجر، ولما بيحضنوني كانوا بيوجعوا جسمي ببقى عايزة أزقهم ومش قادرة ومش مستحملة الأحضان بتاعتهم بسبب جسمي النحيل، ولما كانوا بيبوسوني كنت ببقى غصب عني بمسح البوسة من على خدي، وكانوا بيسألوني انتي مش بتحبينا؟ وكنت بتكسف وأقول لا".
وتابعت: "بوستهم كانت بتشوكني وبتشوك خدي وريحة نفسهم بالسجائر كانت بتضايقني وببقى عايزة أهرب من كل العالم ده؛ لأن أحضانهم كانت بتوجع جسمي النحيل، وأكتر حاجة لسه فكراها لحد دلوقتي وكانت بتوجعني وعاملة جرح في قلبي إن بعض القرايب كانوا بيقعدوني على حجرهم وبينتهكوا طفولتي البريئة، بينتهكوها بقسوة ووقاحة".
ولفتت: "كنت في الأول مش بفهم وكنت بتكسف أتكلم، ودلوقتي كل ده شريط بيمر بيلف في دماغي وعمري ما نسيته ولما كبرت كنت بحس إن الطفلة لسه جوايا، ولسه جوايا البراءة، وكان بيحصل معايا حاجات شبه كده لحد وقت قريب، وبيدخلولي من مداخل انتي فتاة أحلامي، انتي كلك أنوثة وجمال، انتي محصلتيش، وكل ده عشان يوصلوا لحاجة، مش قادرة أنطقها، جوايا وجع كبير، وده كان من ضمن الأسباب إني مشيت.. لسه فيه حواديت وحكاوي هتسمعوها".
وقالت وفاء سالم قبل أيام إن اتخاذها قرار اعتزال التمثيل يعود لأسباب خاصة ستشرحها في وقت لاحق.
وتابعت في حديثها للجمهور: ”عاوزة يبقى في تواصل شخصي بينكم وعملت قناة عشان أرد فيها على أي سؤال يخصني وسأرد على كل الأسئلة سواء النقد الجيد وكذلك وجهة النظر المعارضة لي وسأتفاعل معكم“.
وبينت: ”وأنا صغيرة كان عندي مشكلة مع الكذب ولما بكدب بيكون فيه حجر على قلبي ولما حبيت التمثيل قولت سأنقل المشاعر اللي بحسها سواء غضب أو حزن أو ألم لكن عايزة أرتقي بالذوق العام من خلال أعمال فنية هادفة وحظي كان كويس العمل مع عمالقة مثل الراحل أحمد زكي والكاتب بشير الديك والمخرج عاطف سالم“.
واختتمت: ”قررت بعد تفكير طويل اعتزال الفن وكنت مترددة فيه زمان وسأقول الأسباب في فيديوهات أخرى“.
يذكر أن آخر أعمال الفنانة وفاء سالم هو مسلسل ”القاتل الذي أحبني“ مع هاني رمزي وسهير رمزي، ويعرض عبر إحدى المنصات الإلكترونية، كما شاركت خلال عام 2020 في 3 مسلسلات هي ”ختم النمر“ مع أحمد صلاح حسني، ”الأخ الكبير“ مع محمد رجب و“ونحب تاني ليه؟“ مع ياسمين عبد العزيز، شريف منير وكريم فهمي.