كشفت الفنانة المصرية شذى أنها عاتبة على زميلها الفنان تامر حسني، لعدم سؤال الأخير عنها والاطمئنان عليها بعد وفاة والديها.
وقالت شذى إن سيرة تامر حسني أصبحت "تقلب مزاجها" حسب تعبيرها، ليس لأنها لا تحبّه بل العكس وهما عشرة سنين من العمر، ولكن بسبب السؤال عنها منذ وفاة والديها، معلقة: "ولو ظهر بيظهر كضيف شرف، ومش بتكلم على الشغل أنا بتكلم على الإنسانية، أنا مليش حد هنا ومعنديش أخوات وكل عيلتي برا مصر".
وأضافت الفنانة في تصريحات لبرنامج "أنا سعيد"، عبر قناة "القاهر والناس": "تامر حسني على المستوى الشخصي والمهني شرف في حياتي، خاصة إني بتعرض لأزمات كتير في السوق وتغير الذوق، ولكن تامر في إيده إنه يصلحلي حاجات كتير وأنا أستاهل ده لأن الصحاب لازم يكونوا ضهر لبعض، خصوصًا لو أنت كنت كويس معاه قبل كده، عشان كده بزعل لما بتيجي سيرة تامر، لأني مكنتش مستنية منه حاجة كنت مستنية يسأل عليا".
وأبدت شذى حزنها لعدم تهنئة أصدقائها على أغنيتها الجديدة، معلقة: "رامي صبري لم يباركلي على أغنيتي الجديدة مع إنه كان حاضر معايا المشاكل اللي حصلت، ولكن ممكن يكون انشغل، وتامر عاشور لم يباركلي، مع إنهم أصحابي على طول على تواصل وبباركلهم، وأنا مبزعلش من رامي لأنه طيب وكان في ضهري وبيديني نصايح".
في سياق آخر؛ تطرقت الفنانة إلى تصريحها السابق بشأن مغني المهرجانات الشعبية حسن شاكوش، وقت أزمته مع الفنان محمد حماقي، بسبب أغنية "حاجة مستخبية"، قائلة: "حسن شاكوش مستفز، أنت طالع على ناس مينفعش تقول أي كلام ومينفعش تقول كلام غلط، ومينفعش تقول إن حماقي سارق الأغنية، لأ حماقي واخد الحقوق بتاعة الأغنية وده بيحصل ومتعارف عليه، فاتضايقت جدًا لأن حماقي فنان تقيل ومهم وبنتشرف بيه كمصريين، فعيب اللي أتقال".
آخر أعمال شذى
من ناحية أخرى، تستعد شذى لطرح أحدث أغانيها خلال الفترة المقبلة والتي تحمل اسم "اللي مايتسموا"، من كلمات إيهاب عبد العظيم، وألحان سامر أبو طالب.
وكان آخر أعمال شذى أغنية "مخ تخين" وتم طرحها عبر موقع "اليوتيوب" والمنصات الغنائية، والأغنية من كلمات محمد مصطفى ملك، والملحن مدين، والموزع الموسيقي أحمد عادل، ومهندس الصوت هاني محروس.
