إنجي علي: أنا ضد المساواة بين الرجل والمرأة.. والستات أخدن حقهن على جميع المستويات

رفضت الفنانة والإعلامية المصرية، إنجي علي، مبدأ المساواة بين الرجل والمرأة، مشيرة إلى أن البحث في هذه القضية أحد أسباب خلل المجتمع.

وأضافت "علي" أن المرأة أخذت حقها أضعاف وعلى كافة المستويات، و"الحياة كلها آدم وحواء منذ بدء الخليقة".

ونصحت الإعلامية والفنانة المصرية النساء اللاتي يُحمّلن أزواجهن أكثر من طاقتهم ومقدرتهم المادية الهدوء، معلقة: "الكلمة الحلوة بتفرق إحنا بقينا بخلاء حتى في الكلمة، وأقوى ست في العالم هي الست المصرية، لأنها ملهاش مثيل في أي حاجة، والناس بتحب الرجل المصري وخفة دمه".

وأكدت إنجي خلال حوارها الإعلامي مع سعيد جميل، في برنامجه "أنا سعيد"، عبر قناة "القاهرة والناس" أن خروج المرأة للعمل يبني شخصيتها بدرجة كبيرة قائلة: "نزول الست للشغل بيخليها تهبش في أي حد بسهولة، وده حصل معايا لأني كنت شخصية خجولة ومبقدرش أقول لأ، لكن نزولي الشغل واحتكاكي بفئات مختلفة علمني إني أواجه".

وتابعت في حديثها: "أنا بحب الناس ومقدرش أعيش من غير الناس، وربنا إداني نعمة كبيرة جدًا وهي نعمة الأصحاب، وأنا بشوف دايمًا إن اللي عنده أصحاب كويسين في الزمن ده يبقى محظوظ".

المرأة كل الجتمع

وعلقت الإعلامية إنجي علي، على تصريحها السابق بأن المرأة كل المجتمع، لافتة إلى إنها قالت هذا التصريح في سياق مُعين وليس الغرض منه إثارة الجدل.

وأضافت: "لما قُلت التصريح ده كان بصيغة مُعينة ومكنش بالمعنى ده، لأني مؤمنة جدًا إن الراجل مهم لأنه أبويا وأخويا وابني، والست كمان مهمة ولما كل واحد بيعرف دوره بالضبط ده بيكون مهم، والمشكلة من وجهة نظري إن الأدوار اتغيرت أوي للأسف الشديد".

وأكملت: "لو الراجل بقى عليه حِمل تقيل والست بتساعده بقى هو خلاص مُعتمد إن ده إجباري إنها تنزل وتشتغل، ولكن هي بتساعده وفيه ناس واخدين ده حق مكتسب، ولو الست عايرت الراجل إنها بتصرف عليه عشان بيكون هو ضايقها وعايرها، لأ انت تجوزت لازم تبقى مسؤول إنك تفتح بيت وأسرة".

ونصحت إنجي علي، المقبلين على الزواج، بالقول: "نصيحتي لناس كتيرة وفي ناس هتكون ضدي، إننا كبرنا على أن الست بتتجوز وتخلف وتكون أسرة، ولكن أنا بشوف النهاردة إن موضوع الأطفال في الجواز لازم يكون مدروس صح، ممكن نتجوز ومنخلفش ده مش فرض، لأن الطفل ده هيبقى محتاج وقت وطاقة وفلوس وحاجات كتيرة جدًا، فمينفعش إن ربنا يديك رزق كبير زي طفل وأنت تهمله أو تديه لـ دادا أنا ضد ده تمامًا الأم أم، والأب أب ولازم يكون موجود".