لم تتمالك الممثلة المصرية سماح أنور دموعها خلال حديثها عن النجمين الراحلين سمير غانم وسمير صبري.
وعلقت "أنور"، خلال لقائها مع برنامج "أسرار النجوم"، على العملية الجراحية التي خضعت لها بعد تعرضها لحادث سير، قائلة: "لولا سمير غانم بعد ربنا أنا مكنتش همشي على رجلي".
وأضافت: "سمير غانم كان بيرشحني للأعمال، وكان دايمًا عاوزني أتواجد واشتغل، أفضاله عليّ من وأنا عندي 16 و17 سنة، هو أهم حاجة في حياتي، اللي خلاني أمشي على رجلي، مكنتش عارفة هعمل إيه ولا هتعالج إزاي، وهو اتصرف وكلم الديوان الملكي السعودي وشالوا علاجي 10 سنين".
واستذكرت سماح أنور دور سمير صبري في حياتها، قائلة: "وجعني أن الناس تتكلم عنه وحش، وكل الكلام تأليف، واللي بيتكلم عن حد ساب الدنيا بشكل شخصي ده بياكل لحم الناس ميتة، حد بيتاجر وعاوز الناس تسمع عنه وياخذ 3 دولار من السوشيال ميديا، أنا مش هرد على اللي اتقال لكن اتقهرت".
وأضافت: "سمير صبري كان رجل وفي، عمره ما غلط في حد، الناس توحشت ومبقاش في حرمة للميت، إحنا واقفين في الطابور ومحدش عارف الدقيقة الجاية مين هيكون الخبر اللي جاي".
على صعيد آخر؛ كانت سماح أنور قد ردت على حالة الجدل التي أثارها تصريحها بعدم شربها للماء طيلة 17 عامًا، فقالت إنها تحدثت عن تجربتها الشخصية ولم تنكر كلام الأطباء.
وأعادت الممثلة المصرية نشر جزء من حوارها عبر حسابها في إنستغرام، معلقة برسالة صوتية: "أنا ما بشتغلش في حاجة تخص المية ولا الطب، ولا في حاجة تخلي كلامي مؤثر لهذه الدرجة علمياً".
كما بينت ذلك في حديثها، قائلة: "محدش يعمل باللي بقوله، وإن ده شيء يخصني ونفع معايا، ولو قلت للناس اوعوا تشربوا ميه يبقى كلام مجانين وأنا أبقى ست مجنونة".
