روت الفنانة المصرية سمية الخشاب، قصصًا عن حياتها في فترة المراهقة، وقالت إنها لم تعش هذه الفترة، لأن والدتها كانت تخاف عليها كثيرًا، لدرجة أنها كانت تحبسها في المنزل.
وأضافت الخشاب خلال استضافتها في برنامج "بصراحة مع"، بمشاركة الفنان ماجد المصري: "أمي كانت منعاني أبات عند خالي عشان عنده ولاد، وممنوع أبات عند عمي عشان عنده ولاد، شوف أد إيه الخوف، مينفعش أتأخر، ولو صاحبتي عندي مينفعش أقفل الباب علينا".
وأوضحت الفنانة المصرية: "دلوقتي أنا فهمت لما كبرت أد إيه كان عندها حق، وكانت بتخاف عليا فمبقتش أزعل، لكن الأولاد دلوقتي مش فاهمين الحاجات دي، بس أنا معشتش سن المراهقة".
وكشفت سمية الخشاب أيضًا، عن أول قصة حب عاشتها، قائلة: "قلبي دق في الثانوية العامة، ابن الجيران شاغلني أنا عنيا، ابن الجيران والجو ده، مقدرش أكدب، أنا كنت بنزل الشارع وبوقفه على رجل، كان عندي سكريت كحلي وأنزله به الشارع يقف على رجل، القالب غالب، وشعري كان طويل".
أما فيما يتعلق بالمرأة، فقالت سمية: "قضيتي هي المرأة العربية، نفسي تتغير نظرة المجتمع والرجل تحديدًا للمرأة المطلقة، ليس شرطًا أن يكون طلاق السيدة هو السبب".
وبينت: "أنا مش متجوزة دلوقتي، لكني أعيش أحلى أوقات حياتي، وأحلى مرحلة في عمري، برمجت عقلي أن ربنا خلقني في أحسن صورة، ومش ناقصة حد يكملني، أنا كيان كامل متكامل، أكون أو لا أكون من دون الرجل، مش محتاجة راجل في حياتي، وإذا صادفني بأني قابلت توأم الروح كما يقال، مش هقول لأ، لست في حرب مع الرجل".
وتابعت: "المثل الشعبي اللي بيقول ضل راجل ولا ضل حيطة، وأنا ضده وأرفضه تمامًا، الضل أحسن من الراجل في بعض الأوقات، إذا كان الزوج الأنا يديه ليست متضخمة وحاببني ناجحة وسعيدة وكان سند وضهر لي، هو دا الرجل الصح من وجهة نظري، وليس الضهر أن يمنعني من العمل ويجلسني في المنزل أطبخ وأنظف، ويعنفني، أنا ضد الإهانة للمرأة".
من جهته، تحدث الفنان ماجد المصري عن سبب معارضته بأن تعمل المرأة ممثلة، معلقًا: "أنا مش ضد إن الست تمثل، لكن ضد إن حد من بيتي يمثل"، لتقاطعه الفنانة سمية الخشاب قائلة: "ليه؟ ما بيتك ده مصر العيلة كلها، يعني إيه بيتك ما أنا قريبتك".
ليرد عليها ماجد المصري قائلًا: "الست دي هتعم على الناس كلها، بالعكس، أنا ضد إن بنتي أو مراتي يشوفوا التعب اللي إحنا بنشوفه عشان المجهود الكبير".
