قالت الفنانة المصرية لبلبلة، إنها تسير على نصائح الموسيقار محمد عبدالوهاب لها في الصغر حتى الآن، مشيرة إلى أن الجمهور ينتظرها، ولا يمكن أن تظهر في أدوار هامشية.
وأضافت لبلبة في تصريحات تلفزيونية: "أنا نفسي مش هكون مبسوطة لما أطلع في دور هامشي، حتى الأستاذ وحيد حامد الله يرحمه، كنت ساعات أستشيره، يقولي: "لأ إنتي زي أحمد زكي، متشتغليش في حاجة مش حباها".
وواصلت: "أنا في سنة واحدة 2020، رافضة 9 أعمال، 4 منهم تلفزيون"، لافتة إلى أن ذلك رغم حاجتها المادية والإنسانية للعمل.
وتابعت: "في فترة لما والدتي تعبت صحيًا، مرضها أخد 16 سنة، كان عندي الأولوية لعلاجها، لأني كنت بسفرها للخارج"، مضيفة: "أنا اتعودت إني أعيش بالكتير والقليل برضه، مفيش أعيش على قدي".
وأكملت: "يعني بأي حاجة أرضا، حتى ملابسي القديمة برجع لها وأغير كم فستان أو غيره عشان ألبسه، وأمي أخدت كل دخلي، بس دي كانت كل حاجة في حياتي".
واستطردت: "تلاجتي مفيهاش ولا لحمة ولا فراخ ولا الحاجات دي، عايشة على الجبنة وخلاص، رضا، بس الوقت بيجري ونفسي أقول بشويش علينا يا دنيا، وأنا جوايا يقين إن ربنا هيبعتلي حاجة حلوة تطلع حاجات جديدة جوايا، وأنا مستنياها".
وعن عملها مع الزعيم عادل إمام، قالت لبلبة: "أثر فيا جدًا، وهو شخصية لازم تحبها، وياخد قلبك، ولما بتشغل معاه بسيب نفسي، وهو واخد باله من كل حاجة".
وأوضحت: "وبعدين فهمته، إمتى أنا أتكلم، وبحس من عينه الشوت هيخلص كدا ولا لأ، ومينفعش أتكلم أبوظله إفيه، لازم أبقى حريصة جدًا، والناس حبونا مع بعض، وأنا بحبه قوي، ومعاه بحس بنجاحي، واستفدت كتير من جماهيريته، وبحس بيه إذا كان مبسوط ولا مزاجه مش كويس من خطاوي رجليه".
وواصلت: "أنا مفيش حد احتضني أو سندني، وكانوا يجيبوني يقولوا لبلبة شاطرة، واحدة تعتذر، على طول يطلبوني"، موضحة: "مكنتش بزعل، وخلي بالك من جيرانك مكنش دوري، كان دور ميرفت أمين، وهى اعتذرت ودي كانت أول بطولة مطلقة مع المخرج محمد عبدالعزيز، ودا من أحلى أدواري، وجابوني كدا، وكل خطوة ليا كنت بكلم ربنا هعمل إيه بعد كدا".
