محمد سراج: حذرت رنا سماحة من حضور حفل زفافها.. ويوجه رسالة لـ شيكابالا

وجه الفنان المصري محمد سراج، رسالة إلى صديقته المطربة رنا سماحة، بمناسبة اقتراب حفل زفافها على سامر أبو طالب، مبديًا سعادته بارتباط الثنائي خاصة وأنه تربطه علاقة وطيدة بهما.

وقال سراج في لقاء مع موقع "فوشيا": "أنا عمري ما أتنمر، الإنسان اللي جوايا بيبقى شغال عادي، بس بتحصل حاجة تخليني أحس إني في إفيه ممكن أقوله أو حاجة أتنمر عليها، فبسيب نفسي بقى".

وأضاف ضاحكًا: "أوريكي الواتساب عندي، رنا سماحة وسامر أبو طالب الاتنين باعتين ليا توصيات وتأمينات علشان أهدا يوم فرحهم، قولتلهم حسب فرحكم، لو دمه تقيل هتلاقوني طيب وقاعد، لو لقيت فرح حلو هلقط شبكة الجنان علطول".

وتابع: "طبعًا بقول لرنا وسامر ألف مبروك، سامر عشرة عمر وبلدياتي من المنصورة، ورنا سماحة عشرة عمر، وأنا فرحت جدا إنهم حبوا بعض".

وعن مقاطع الفيديو التي ينشرها من حين لآخر، وكان آخرها عندما كان يحتفل بتتويج النادي الأهلي ببطولة دوري أبطال أفريقيا، قال: "ده الأهلي، والناس عارفة يعني إيه الأهلي بالنسبة ليا، لو الماتش ده كنا خسرناه مكناش هنخلص من التحفيل، وهي دي حلاوة الكورة، وكنت مبسوط أوي باليوم ده".

وعن أزمة الفيديو المسيء لمحمود عبدالرازق شيكابالا، الذي انتشر على السوشال ميديا عقب مباراة نهائي أفريقيا، بين الأهلي والزمالك، قال: "أنا ضد تماما الي حصل لشيكابالا، حتى عندي عالفيسبوك بشير حاجات كتير ليه واهداف هو جابها لإني بحبه جدًا، وجاب جول جامد جدا في ماتش النهائي".

وتابع: "بس اللي عاوز أقوله لشيكابالا إن لعيبة الكورة طول عمرهم بيتشتموا وبيتهانوا، والجمهور بيدخل في منطقة أعراض وده مش صح بس إحنا مش عارفين نحط قانون علشان يوقف الي بيحصل ده".

وأردف: "رغم كده في لاعبين كتير مدخلوش في الحتة دي، شيكا أصلا مش مستني حد يدافع عنه لإنه ماشي بمبدأ أنا بعرف آخد حقي سواء بحركات ملهاش لازمة في الماتشات أو بقصص على صفحته، وده مش صح، لإنه لاعب كبير ومفيش داعي يرد على الناس دي، ومع ذلك أنا ضد كل اللي بيحصله أكيد".

وكانت الفنانة الشابة رنا سماحة، كشفت عن خطوبتها من الملحن سامر أبو طالب، في حفل بسيط اقتصر فقط على العائلة والأصدقاء، وذلك بعد علاقة عاطفية جمعتهما من قبل، وهو ما فاجأ الجمهور، خاصة وأن الأخير سبق وهنأها على خبر خطوبتها الذي أعلنت عنه في وقت سابق، دون الكشف عن هوية العريس.

ونشرت سماحة عبر إنستغرام، صورًا من حفل الخطوبة، حيث ارتدت فستانًا أبيض اللون مخططًا باللون البني، وارتدت "تاجًا" كتب عليه كلمة "bride".

في حين ارتدى سامر قميصًا، وبدا الثنائي في غاية الفرح والسعادة، وعلقت رنا البالغة من العمر 30 عامًا على الصورة قائلة: "الحمدلله الذي تتم بنعمته الصالحات.. ادعولنا دعوة حلوة"، لتنهال عليها المباركات والتهاني، وعلق متابعون: "مفاجأة غير متوقعة هو مش سامر بارك لك على الخطوبة في الأول؟".