كشف الفنان المصري تامر فرج، موعد عرض الجزء الثاني من مسلسل "الآنسة فرح"، الذي حقق نجاحًا كبيرًا في الجزء الأول، ونال إعجاب الجمهور.
وقال فرج في لقاء خاص مع موقع "فوشيا": "يوم 8-11 هينزل على منصة شاهد، وبعد كده هينزل على فضائية "إم بي سي 4"، وبنصور دلوقتي الجزء الثالث".
وأضاف: "أنا كنت عارف إن في أجزاء تانية، لإننا اشترينا الفورمات من برة، بـ 4 أجزاء، ومضينا على 4 أجزاء، ولكن هل هينجحوا ولا لا؟! ده اللي في علم الغيب".
وتابع: "المسلسل فكرته جريئة شوية، ورغم إنه أجنبي إلا إنه مناسب للثقافة المصرية، لإن العمل كله بيتكلم عن بنت من زمان مامتها وجدتها بيحذروها إنها لازم تخلي بالها ولازم تفضل عذراء، ودي الحاجات الي احنا اتربينا عليها".
وأكمل: "لو في شوية اختلافات بين المسلسل الأصلي والعمل بتاعنا، في بعض الحاجات الثقافية، إحنا تلافيناها، زي مثلا الاتنين الي بيعيشوا مع بعض من غير جواز، ده إحنا شلناه خالص وغيرناه".
وواصل فرج حديثه قائلًا: "الجزء التاني إتضاف ليه ستات أكتر، أنا محصور دايمًا في أدوار الإغراء، السنة دي شخصية ماجد الألفي في المسلسل وعلاقته المتوترة دايمًا مع دلال اللي هي أم فرح، ما بين إن هما يسيبوا بعض ويقربوا من بعض ويتجوزوا، وبعد كده بيدخل على ماجد سيدات أخريات وحالات جواز أخرى والموضوع بيكبر".
وعن كيفية تعامل زوجته معه، وما إذا كانت تشعر بالغيرة، قال تامر: "رانيا مراتي معايا علطول، لو اتحركت من غيرها أتوه، لإنها هي الي ماسكالي كل شغلي".
وعن المفاجأة التي أعدها خطيب الفنانة بشرى لها، في مهرجان الجونة، علق تامر فرج: "أنا انبسط لبشرى جدا، لإنها إنسانة جميلة وجدعة أوي أوي، ربنا بيعوضها خير وعلشان هي واثقة في ربنا وماشية كويس فلازم تتعوض خير، وربنا يتمملها بخير ويهدي سرها".
يذكر أن مسلسل "الآنسة فرح" بطولة: أسماء أبو اليزيد، ورانيا يوسف، وتامر فرج، وأحمد مجدي، ومحمد كيلاني، وأحمد خالد صالح، ومجموعة من الفنانين الآخرين، وهو من إخراج أحمد الجندي.
