أعربت الفنانة والإعلامية المصرية جوري بكر، عن سعادتها بنجاح تجربتها الأولى في مجال التمثيل، من خلال مسلسل "البرنس"، حيث جسدت شخصية زميلة الفنانة اللبنانية نور في الفندق الذي كانت تعمل به.
وقالت جوري في لقاء مع موقع "فوشيا": "مبسوطة إني بتكرم على أول دور عملته كممثلة، في الأول كنت مذيعة في برنامج عرب وود، دلوقتي ممثلة فالنهاردة كانوا حابين يكرموني".
وأضافت: "أنا مكسوفة جدا وبيتعمل معايا إنترفيو، متعودة دايما أنا اللي بدير اللقاءات، الموضوع بيكون صعب شوية لما بتكوني تحت دائرة الضوء".
وتابعت: "أكيد لو جالي برنامج حلو وفكرته حلوة هعملها، بس أنا حابة فكرة إني أكون ممثلة دلوقتي لإنه كان حلم من أحلام حياتي وجالي بالصدفة البحتة جدا والحمد لله من رأي الناس اللي حواليا أصحابي وأهلي والجمهور، قالوا إني بمثل كويس فقلت ليه لأ".
وأردفت الفنانة الشابة: "أستاذ محمد سامي المخرج، كلمني وقالي بقولك إيه بتعرفي تمثلي ولا لأ، قولتله والله بعرف أمثل وأوعدك إني مش هخذلك، فعرض عليا الدور عاجبني جدا فكرته، شرير أووي وحبيته علشان الشخصية دي موجودة في حياتنا كتير، الصديقة المؤذية أو الشخص المؤذي اللي بتشتغلي معاه".
وواصلت: "حبيت الفكرة وقلت إنها هتعلم مع الناس وأنا بحب الأدوار اللي من النوع ده وكويس إني قدرت أوصل الشخصية المستفزة دي للجمهور".
وأوضحت: "كل مشاهدي كانت مع نور، أنا بعشقها من أيام فيلم شورت وفانلة وكاب، فهي المفضلة بالنسبة لي، حاولت طول الوقت أكسر الحاجز ما بيني وبينها، هي صغيرة كده وجميلة وشاطرة جدا وطبيعية جدًا فإدتني مساحة إن ميكونش في بيننا كسوف".
واستطردت: "في مشاهد الضرب كانت بتقولي اضربيني جامد، والله صعبت عليا، الحمدلله عدت على خير وانبسطنا بالشغل مع بعض، وأنا بالذات كنت مبسوطة أوي إني اشتغلت معاها".
وعن أعمالها الجديدة، قالت: "دلوقتي بشتغل مع نرمين الفقي في مسلسل "لؤلؤ" ومعانا مي عمر وأحمد زاهر وإدوارد، ومجموعة كبيرة من الفنانين".
وعن إصابات فيروس كورونا المتعددة في الوسط الفني خلال الفترة الأخيرة، قالت جوردي: "أقول لكل الناس المصابين بكورونا ربنا يشفيهم ويرجعوا بألف سلامة، والوباء يخلص على خير ومحدش تاني يتصاب".
واختتمت: "وأقول للمخرج محمد سامي ألف سلامة عليك لإن موقع التصوير بيبقى وحش في غيابه، معظم الوقت كان معانا في تصوير "لؤلؤ" بيشرف على حاجات كتير، وكمان مساعد محمد سامي، الأستاذ محمد عبد السلام، لإنه هو اللي بيخرج مسلسل "لؤلؤ"، هو كمان اتصاب بكورونا، وباقي فريق العمل أجرى المسحة الطبية وطلعنا بخير الحمدلله".
يذكر أن مسلسل "البرنس" تم عرضه في موسم دراما رمضان الماضي، وحقق نجاحًا كبيرًا من حيث نسب المشاهدة، وهو من بطولة النجوم: محمد رمضان، وأحمد زاهر، ونور اللبنانية، ونجلاء بدر، ومحمد علاء، وأحمد داش، ودنيا عبد العزيز، وإدوارد، وروجينا، وكوكبة من الفنانين، وهو من إخراج وتأليف محمد سامي.
