كشفت الإعلامية المصرية، سالي عبد السلام، عن إصابتها بمرض الثعلبة، الذي أدّى إلى تساقط كمٍّ كبير من شعرها، موضحة، أنّها خضعت لعلاج استمرّ لعام كامل، حتى أنعم الله عليها بالشفاء.
وكتبت عبر حسابها على إنستغرام: "بقالي سنة بحضر للزيارة دي!.. بعد ما الحمدلله ربنا عفا عني.. وشفاني بعد ابتلاء واختبار".
وأضافت: "كنت زعلانة على نفسي سنة ومش عارفة أفرح!! بس رحت للناس الأقوى مني اللي خسرت شعرها كله ولسه مش عارفة هتعالج من المرض ده ولا لا! رحت أتعلم الرضا.. رحت أتعلم الحمد بضمير مرتاح..رحت عشان اعرف الابتلاء واتعلم منهم...رحت أهون عليهم!".
وتابعت :"من قبل فرح أخويا بيوم!!! من سنة تقريباً بتعالج بالكورتيزون واتبهدلت.. جسمي ووشي كله اتبهدل عشان أعالج شعري ..الحمدلله حقن الكورتيزون في الرأس كل أسبوع 70 شكة عداهم! من وجعها وتقلها وحرقانها دموعي كانت بتنزل لوحدها والدكتورة تطبطب عليا (سماح الملاح ..ربي يسعدك) وأمي مستحملتش من أول مرة، مردش أجيبها تاني معايا وكنت بخبي عليها وأقولها مخدتش الأسبوع ده!".
واستكملتْ حديثها قائلة: "جالي 12 ثعلبة في شعرى فاضيين تماماً سبحانك!..لا stress ولا زعل ولا كلام فاضي، الدكتور نفسه قالي دي عين أنا مشفتش حد كدة!!! وأنا قلت لا.. مع إن العين حق.. وأنا مؤمنة بالحسد ولا أتناقش فيه وميهمنيش رأي حد.. ومن الأسباب مشكلة في مناعة جسمي.. جسمي كله كان بيهاجم شعري.. سبحانك.. الحمدلله.. ابتلاء في أكتر حاجة بحبها وبخاف عليها!".
وأوضحت: "قعدت أتعالج 4 شهور غلط وكان شعرى كله هيروح وكانت كل شوية بتكبر وكانوا اتنين لفيت على 8 دكاترة عشان مكسوفة أروح لدكتور معروف! أو حتى أعمل شعري عند كوافير عشان مضايقة ومكسوفة منها حتى في تصوير لبنان لحد ما تطلع الحمدلله".
وأكملت: "المذيعة مفيدة شيحة كلمتني وكلمتلي لدكتور عاصم فرج ومخدش مني أي فلوس وكنت مش عارفة أشكره أو أشكرها إزاى!. في ميزان حسناتكم فكيتوا كربي... ربي يسعدكم ".
وقالت :"وللناس اللي بتسأل على روتين إزاي بهتم بشعرى وmsgs مش برد عليها والله ما عندى روتين وعشان كده مش برد مش خبث!.. ربنا يبعدنا عن أي خبث وربنا يعلم إني لو في أي حاجة أقدر أفيد بيها هرد دايماً.. أنا بستعمل شامبو وبلسم للأطفال ومعروف وحمامات كريم كلها مصري مش مستوردة ومش بغلاء المنتج النتيجة بتبقى أحسن! أبداً والله.. وفى الآخر كلها جينات وبتختلف من حد لحد!! محدش فينا زي التاني!".
واستطردت سالي: "والله بحط اكستنشنز ساعات كتير زي أغلبية البنات مش هكدب.. وجالي إعلانات منتجات كتير مش شعر بس وجربتها ومفيش منها نفع.. ومش هعملها لو مش مقتنعة!!!!!! ناس من أهل بيتي عارضتني إنى برفض الرزق.. واتمسكت بموقفي!!".
واختتمت: "الله الغني عن أي رزق مش مقتنعة بيه أو مش شايفاه حلال ويسترنا.. لو تعرف إنهم 24 قيراط وترضى بدل ما تستكتر على حد حاجة واتحرم من حاجة بدالها وربنا وزعهم بالعدل وباللي شايفه أنفع ليك.. وارجع تاني وأقول لكم دينكم وليا ديني.. لكم أفكاركم ولي أفكاري".
يُذكر أنّ مرض الثعلبة، من أمراض المناعة الذاتية، وقد تسبّبه الاضطرابات النفسية، ويؤدّي إلى تساقط شعر المريض، وفي بعض الحالات يفقد المريض كامل شعره.
